紅軍贏波鶴臣有面見老細

利物浦尋日凌晨作客以1:0險勝保頓，聯賽兩連勝暫時脫離降班漩渦，領隊鶴臣賽後勁High，自爆即將同新老細約翰亨利開會，贏波總算有面見人，而且可以開口要求1月轉會市場重開買人，英國博彩公司William Hill更加將紅軍以前4名完成球季嘅賠率，煲熱至6倍贈興，難怪鶴臣笑得咁開心。

躋身前4賠率急跌到6倍

麥斯洛迪古斯完場前4分鐘嘅入球，協助利物浦打沉保頓，雖然鶴臣同紐卡素教頭曉頓，依然係英超下個被炒領隊3倍並列大熱門，但利物浦重返前4位嘅賠率，已經被推低到得6倍，相反，降班賠率由12倍轉冷至26倍，證明開始被莊家睇好。

紅軍嚟緊周日將硬撼車路士，對保頓傷出嘅祖高爾，今日接受檢查睇吓到時踢唔踢得，但無論點，鶴臣都可以鬆一口氣，會面見專程由美國飛到英國開會嘅新老細：「我哋幾乎每日都聯絡，佢對球會事務好有熱誠，今次會用啲時間同我見面。我一直相信，球隊朝住正確方向行，只不過需要更多時間重建，贏波點都比輸波好，依家我哋嘅士氣開始提升，我會同佢傾吓球隊未來發展。」