7巴打：馬田冇錢供樓焗蝕讓豪宅
7巴打：馬田冇錢供樓焗蝕讓豪宅
NBA球壇有幾位仁兄嘅射姿好奇怪，小牛前鋒馬利安同火箭射手奇雲馬田就係佼佼者，但估唔到馬田除咗射姿怪之外，份人亦都古靈精怪。最近有美國傳媒爆料，話佢拖緊銀行條數，家陣要拿拿聲賣樓還錢！
裝5部電視睇幾場NBA
馬田08年問銀行借咗筆錢買樓，本身佢個個月都準時還錢，點知去到今年6月就停咗，據講佢已經收到銀行嘅信，再唔還錢人哋就收樓。馬田唔想渣都冇，決定將呢間位於薩克拉門托嘅豪宅平放，據報係100萬美元左右，目前已經有幾位Fans睇過樓，佢哋覺得能夠住喺球星嘅舊屋好有型喎！
呢位火箭球星搵咁多，無端端拖銀行數已經奇怪，最怪係間2,000呎豪宅總共有7部電視，但其中5部竟然裝晒喺同一幅牆上面，地產經紀就話馬田係想同一時間睇幾場NBA直播所以先咁做，果然係優質生活派，最慘就係原來充大頭鬼，連供樓都冇錢！