艾佛遜投比錫達斯皆因等錢使

「答案」終於有答案！已經「量地」超過半年有多嘅NBA一代「戰神」艾佛遜，據講日內就會加盟土耳其籃球聯賽勁旅比錫達斯，展開職業生涯新里程，但朱楓相信呢度絕對唔會係佢最後一站，話唔定未過2010年「AI」已經又扭計離隊！

年薪1500萬低過NBA後備

據美國傳媒報道，「AI」艾佛遜已經答應比錫達斯開出2年總值400萬美金嘅合同。不過比錫達斯嗰邊都知艾佛遜麻煩，據講喺合約入面有一個附加條件，就係艾佛遜打完第一季後，可以選擇終止合同，但就唔可以喺第一季完前終止合同；比錫達斯嘅董事會主管亞爾辛日前專登飛去美國同「AI」傾其他細節，包括為佢嘅囝囝喺伊斯坦布爾選擇學校嘅問題。

聽到以上條款，大家可能覺得比錫達斯對艾佛遜都算唔錯，查實除番開，艾佛遜一年只係得區區200萬美金（約1,560萬港元）人工。唔單止喺NBA屬於最低級別，甚至基本上連後備都不如，因此，朱楓相信艾佛遜依家真係好等錢使，但好衰唔衰，又冇其他NBA球隊肯要佢，「AI」先至迫於無奈咁去土耳其客串，我覺得他日只要有是但一隊NBA球隊向佢招手，艾佛遜都一定會執包袱趕返美國，畢竟佢今年只係得35歲，唔算太老，加上以前又係NBA一代巨星，畀着係你，又點會甘心留喺一個冇人睇嘅土耳其聯賽呢？