老竇力撐陸志豪決心追夢

晨曦上仗主場以4:5先勝後敗於公民，相信許多「黃軍」支持者，迄今都無法接受這個殘酷戰果。慶幸「慘劇」中尚有一點安慰，今季新簽的前加拿大青年軍陸志豪（Michael Luk）表現搶鏡，連中三元。「相比起入3球，如果晨曦贏波我會開心好多！」矢志在港闖出名堂的「米高」表示。

米高爸搭上搭來港試腳

現年24歲的陸志豪，5歲時隨家人移居加拿大，自小就醉心足球的他，夢想有朝一日可以成為職業球員。難得「米高爸」十分支持愛兒向夢想進發，除不斷鼓勵外更付諸行動，靠朋友「搭上搭」來港試腳。「我承認嚟香港之前，聽到好多人講呢度球市低迷，不過同爸爸商量之後，認為喺香港作為我『夢想』嘅起點都唔錯呀！」坦言希望到歐洲或日本落班的「米高」，今季前回流香港後即隨晨曦操練，並憑在大陸集訓的出色表現，獲得一紙合約。

「好開心成為晨曦一分子，希望幫到球隊攞好成績，亦等多啲人識得我，或者咁樣吸引到香港以外地區嘅球探、球會嘅注意。」雖然心頭甚高，但「米高」強調從未有看輕香港足球：「我之前係低估咗香港聯賽嘅水平，但經過幾個月置身其中，大部分球員技術都好好、好聰明，令我學咗好多嘢。」隨着表現愈來愈好，加上多員主力先後傷停，令「米高」上陣機會激增，上仗擔正更首演帽子戲法，大獲好評。「職業生涯第1次入3球，可惜咁都贏唔到，好大打擊。不過冇辦法，卡爾、李明同高尼路都唔踢得，若果我哋齊人就唔係咁。」他謂不敵公民後隊友們都很沮喪，有些更流下男兒淚，但這些既是經驗，又是回憶，他將會好好記住、受用終生。

怕食內臟冧巨肺G.E.M.

儘管係「香港人」，但在加拿大成長的「米高」，飲食習慣方面也有着許多外國人的「死穴」：「打邊爐更係我嘅最愛，但係試過有隊友介紹我食啲動物嘅內臟，我真係頂唔順。」「米高」還有一個心願，就是跟巨肺G.E.M.見面：「我之前唔知邊個係G.E.M.，但係聽過佢嘅歌之後，就迷上咗佢 。佢唔止唱歌好聽，個樣亦好靚、好可愛，可以同佢見到面就好囉！」現正獨身的「米高」，不經意透露了擇偶條件。