「地區紅魔鬼」睇中皮利斯
「地區紅魔鬼」睇中皮利斯
唔單止工廠仔，查實章治歷都係阿仙奴Fans，除咗因為兵工廠幫小弟贏過大錢之外，佢哋嘅水銀瀉地踢法都係引人入勝嘅地方。相信唔少阿仙奴球迷同章治歷一樣，好想主帥雲格簽番老將皮利斯，可惜事與願違！
皮利斯今個夏天畀維拉利爾放棄，近期就去咗阿仙奴跟操，話就話保持狀態，但唔多唔少都想學上季嘅蘇甘保咁回巢。雲格雖然冇心簽皮利斯，但連日嚟不斷幫呢位36歲老將講好說話，大讚前者身體狀況一流，仲有本錢喺頂級聯賽効力。
直到前日，有消息指克拉雷鎮想搵皮利斯加盟，呢隊有地區聯賽「紅魔鬼」之稱嘅球隊，今季獲老闆雲菲特開水喉，先後向英甲同英乙球員挖角，連環打破地區聯賽轉會費紀錄，據講克拉雷鎮領隊伊雲斯仲有成100萬鎊轉會費使添！皮利斯較早前講過，若果到1月都仲未搵到班落就會退役，究竟佢肯唔肯紆尊降貴落地區聯賽搵食？真係要拭目以待嘞！