艾迪巴約中三元曼城奏捷

曼城尋日凌晨喺歐霸盃A組作客以3:1打沉列治普斯納，受到「朗尼效應」影響，今季長坐冷板嘅艾迪巴約難得打正選，即刻連中三元發威，話畀人知曼城唔簽朗尼都掂，領隊文仙尼為咗獎勵佢，事先張揚話會畀佢喺周日嘅英超倒戈時正選上陣再戰阿仙奴，即係話佢又有機會搞事嘞！

紅軍夏德擁躉遇襲

艾迪巴約完成帽子戲法後，開心到走去跪拜隊友大衞施華，原因係佢入嘅第2球同第3球，都係靠對方嘅傳中球搞掂。賽後文仙尼咁講：「我相信艾迪巴約會出場對阿仙奴，前鋒最緊要有信心，佢依家狀態冇得頂，我唔認為佢同泰維斯合作有問題，而且佢哋都試過同場上陣對黑池，雙箭頭亦係我心水陣式。」

賽後艾迪巴約收埋個幸運足球入波衫，扮大肚婆風騷離開，記得上季曼城主場贏阿仙奴4:2，佢入完波衝到阿仙奴球迷面前挑釁，今次文仙尼保證佢踢正選，隨時又出事。另一方面，利物浦收起7個主力作客同拿玻里踢成0:0，比賽期間有紅軍球迷喺街頭被襲。至於辛尼特主場2:0贏夏德，就兩度發生暴力事件，據講夏德Fans喺酒店畀人打，又曾經有30個擁躉喺街上畀100個辛尼特球迷圍毆，當中有幾個被割傷送院。