朗尼怕咗紅魔躉續約５年

朗尼轉會反轉再反轉？兩日前先公開表態話明非走不可嘅曼聯球星朗尼，尋晚突然嚟個180度U-Turn，同曼聯續約5年至2015年，財政細節未有公布。之前反晒面互相數臭嘅領隊費格遜同「魔童」，續約後即刻大讚對方先係自己未來發展嘅理想之選，不過有人就認為，係之前一晚紅魔鬼球迷包圍朗尼大宅發出死亡威脅，建下嘅奇功先真！

紅魔鬼會方同朗尼雙方連日來齊齊扮苦主，曼聯一方就暗示朗尼貪錢同忘恩負義，「魔童」就怨曼聯配佢唔起，冇爭標能力焗住走。儘管經過前日由費格遜、曼聯行政總監基爾同朗尼經理人史達福特嘅危機會議後，雙方仍然未傾掂數，點知事件去到尋晚，紅魔突然喺官網宣布同朗尼成功續約嘅喜訊。

要再抖3周無緣打吡戰

費Sir話：「呢個真係艱苦嘅一星期，我真係為朗尼答應留隊好開心。有時當你置身球會之中，你未必會了解到球會嘅偉大，但經過呢幾日發生嘅事，先至令到朗尼知道曼聯係間幾咁偉大嘅球會。」費Sir話對於朗尼願意接受挑戰感到開心，並指球會上下都會繼續支持朗尼，但佢嘅周薪係咪加到15萬鎊就冇人出嚟確認嘞。

對於費Sir嘅讚賞，朗尼識做咁回應：「我為續約成功感到興奮，係領隊同班主說服到我，令我明白自己係屬於呢度。我深信球會管理層、教練團、董事局同班主都會努力去延續球會嘅光輝歷史，呢個正係當日我加盟嘅原因。」雖然成功傾掂續約，但費Sir就宣布朗尼早前喺練波畀史高斯踢親嘅足踝傷勢唔輕，預計要抖多三個禮拜，下個月10號鬥曼城嘅打吡戰都唔使預佢。

Fans恐嚇過曼城就死

事實上，喺朗尼轉軚續約之前一晚，曼聯球迷對於呢個「反骨仔」行為相當不滿，約40個激進分子更拉隊包圍朗尼嘅豪宅，不斷高呼要同朗尼會面，更拉出「加盟曼城你就會死」嘅恐嚇橫額！就算6個保安員到場戒備，全程匿喺屋企用閉路電視睇住情況嘅朗尼一樣騰雞，最終要打電話報警求救，一眾球迷喺警方到場後先至散去。

深知道得罪球迷冇好結果嘅朗尼尋晚作出補鑊承諾：「我肯定球迷喺過去一周會感到非常失落，好彩球迷都係明白事理，我會用我嘅表現贏番佢哋嘅支持。」

朗尼續約風波

逐格睇

8月14日 費格遜得悉朗尼無意續約。

10月2日 朗尼缺席對新特蘭賽事，費格遜稱其受傷。

10月12日 朗尼離奇傷愈代表英格蘭對黑山，賽後暗斥費Sir講大話。

10月19日 費格遜證實朗尼想離隊。

10月20日 朗尼發聲明表示唔會續約。

10月21日 曼聯巨頭基爾、費格遜與朗尼經理人開危機會議，但冇結果。

10月22日 曼聯於官網發表聲明，朗尼續約至2015年。