新班主向鶴臣派定心丸

利物浦新老闆約翰亨利尋日同領隊鶴臣見面，大派定心丸話暫時冇打算炒人，代表佢受訪嘅波士頓紅襪會長湯姆華納仲話，佢哋會諗辦法解決紅軍債務問題，又承諾會提高軍費爭冠軍，強調以往佢哋都試過用1億美元（約7.8億港元）簽入日本投手松坂大輔，錢絕對唔係問題。

根據湯姆華納所講，作為紅襪老闆嘅約翰亨利，20年前已經鍾意利物浦，所以入主後會盡全力重建晏菲路王朝：「債務係大問題，一定要想辦法清除，我哋同吉列、希斯唔同，佢哋當利物浦係投資工具，但我哋最在乎勝利，要喺英超成功就需要用龐大軍費，呢點我哋完全明白，正如4年前紅襪簽入『怪物投手』松坂大輔，轉會費連薪酬都接近1億美元。」

曼城贏波文帥直指冠軍

紅軍前晚不敵愛華頓後，鶴臣成為下個被炒英超領隊熱至2.86倍，利物浦降班賠率更加由19倍跌到12倍，但湯姆華納話冇計劃換教頭：「鶴臣需要時間改善成績，我哋對佢好有信心。」

另一方面，有機會踢利物浦出Big4嘅曼城，尋日凌晨靠泰維斯梅開二度、大衞施華入1球以3:2打沉黑池，升上聯賽榜次席，泰維斯暫時累積7球，成為3.75倍英超神射手次熱，領隊文仙尼又話目標係爭英超冠軍，亞軍都唔收貨。