撤換鶴臣只係搵替死鬼

於默西塞德郡打吡不敵愛華頓後，利物浦恥辱性跌落聯賽榜尾2位置，最令人擔心係球會財政問題雖然解決，但表現依然係一池死水，完全失去入球板斧，唔少人都認為新任領隊鶴臣時辰已到，係時候趁有新水喉另覓賢能。

雖然成績欠佳好多時都關領隊事，葡萄牙國家隊就係一個鐵證，一炒奎雷斯後即時反彈，不過將利物浦積弱嘅責任推畀鶴臣，就似乎唔多恰當，首先鶴臣冇可能係冇料，否則上屆亦唔可能帶領富咸殺入歐霸盃決賽，佢接手紅軍之後，亦未聽見有任何將帥不和消息傳出，若然炒佢其實亦只係搵替死鬼。

首要建立球員默契

其實歸根究柢，利物浦今季大脫腳皆因易主一事拖拖拉拉，雖然今年暑期都入到貨，好似新兵魯爾梅利斯都有一定級數，但畢竟都係轉會窗關閉前先至臨急臨忙買入，水土不服在所難免，再加上世盃後遺症，利物浦嘅組軍進程慢人個幾月，所以現時最需要嘅唔係換領隊，而係應該抓緊時間追回失地。喺過往兩輪歐霸盃，鶴臣都錫住班主力盡出副選，計我話現階段應該keep住強陣，把握每場波去建立默契。