謝德謙未雨綢繆約隊友進修

甲組球員閒時相約燒烤、遊船河、麻雀耍樂，甚至出外旅行，相信各位球迷也時有所聞，但大家可曾聽聞，有甲組球員相約重返校園、集體進修？今日作客青衣的公民，陣內13個華人中有11個身兼球員及學生哥兩職，堪稱本地球壇「最上進球隊」。

最上進球隊練完波傾功課

一個偶然機會，筆者看到公民門將謝德謙身穿長袍、置身畢業禮的照片，一問之下，得到既錯愕又佩服的答覆：「張相係我完成咗一個運動管理遙距課程嘅文憑之後影嘅，已經讀咗8個月啦！唔止我，仲有4個隊友一齊讀，5個人平日已經一齊練波、比賽，依家得閒仲會一齊溫習、傾功課。」謝德謙一臉自豪地道。

據謝德謙表示，他和馬嘉祺等隊友8個月前決定自費進修，目的只有一個，就是為將來鋪路。「雖然我打算踢到退役先轉行，但點都應該早啲做定準備，希望攞咗個學位，到時轉行可以有更多選擇。」學以致用，謝德謙現時也有參與公民的推廣工作，希望將自己所學回饋球會。

除謝德謙5人外，公民尚有6名華將乃「讀書人」，證明踢波搵食亦不一定係波牛，懂得未雨綢繆、裝備自己亦大有人在．抵讚！

公民上進球員

修讀課程：運動管理Top-up Degree

謝德謙、陳文俊、黃耀富、羅振邦、馬嘉祺

修讀課程：毅進計劃

廖富源、楊賜麟、馮啟匡、沈國輝

修讀課程：城大會計系學士

曾昭達

修讀課程：IVE運動管理高級文憑

談樂軒