港欖兄弟拍住上羊城

廣州亞運會是一眾年輕運動員實現夢想之地，兩位熱衷欖球運動的港隊新丁，現年21歲的蘇學乾與年僅20歲的謝竣恆，自小情同手足征戰各大小賽場。這對好兄弟今次亦希望齊齊入選港隊拍住上，在羊城一顯身手。

7人欖球賽近年在香港搞得有聲有色，令不少年輕人均樂於投身「7欖」行列，蘇學乾7歲開始學打欖球，加入沙田少年球會「沙皮」，自此成為隊中骨幹成員，不經不覺已經累積了14年波齡。前年開始入選港青U19同U20，今年成為香港15人欖球隊成員，獲欖總重點栽培。現於柴灣IVE修讀體育運動科學的蘇學乾表示：「現時香港隊每星期兩課操練，自己亦會做足準備，珍惜今次機會。」

身形細小唔怕衝撞波

謝竣恆雖然細蘇學乾一歲，但波齡卻更長，他5歲起已跟哥哥學打欖球，同樣加入「沙皮」，多年來一直得到家長支持，直至考入中文大學，修讀體育運動科學之後，欖球仍是他的至愛。身形細小、被稱為「A仔」的謝竣恆笑言無懼打「衝撞波」：「別以為我『細粒』就容易被撞低，即使對方身形龐大我亦不會擔心，而且我勝在夠靈活，可以突襲搶分。」

7欖亞運小資料

賽期：11月23日至25日

地點：廣州大學城體育中心

賽制：每場14分鐘、半場7分鐘，小組採單循環角逐，產生8強後進行淘汰賽決定金、銀、銅牌。

7欖亞運分組形勢

男子A組：日本、香港、泰國、馬來西亞、蒙古

男子B組：南韓、中國、斯里蘭卡、印度

女子A組：中國、泰國、香港、烏茲別克、南韓

女子B組：哈薩克、日本、新加坡、印度