呢排好多朋友結婚，章治歷淨係畀人情都畀到窮，最大鑊係夜晚睇完歐霸盃，第二朝就要晨早殺出去做兄弟，真係唔隊多兩杯咖啡都唔掂！不過結婚一生人一次，章治歷又出名夠義氣，老友叫到冇理由托手(月爭)o架！
意大利名宿拉雲拿利雖然冇章治歷咁型仔，但佢老人家都一樣有情有義。「銀狐」喺職業生涯尾聲曾經効力過蘇超嘅登地，當時球會孭住2,300萬鎊債務，好快就破咗產被接管，會方亦都出唔起拉雲拿利份波糧，迫於無奈炒咗「銀狐」。
目前喺蘇甲角逐嘅登地仲未脫貧，最近畀稅局追收36萬鎊（約440萬港元）欠稅添，估唔到只係効力過登地5場嘅拉雲拿利，竟然話會科水接濟球會，盡一切能力幫登地渡過難關。拉雲拿利咁夠義氣，登地球迷梗係當佢神咁拜啦！跌到落意丙嘅佩魯賈家陣都好唔掂，唔知「銀狐」仲有冇多餘錢呢？