本文重點
香港學界手球代表隊於上星期揮軍澳門，出戰「亞洲中學生手球（男子）錦標賽」。雖然港隊面對亞洲列強挑戰，但憑藉就讀元朗公立中學的龍門葉冠英「卡斯拿斯上身」屢救險球，終於協助港隊「爆冷」擊敗泰國、印度等勁旅，贏得亞軍做「亞洲二哥」！
誠如教練龐耀榮賽前分析形勢表示：「今次參戰球隊之中，伊朗實在太勁就輸硬，而東道主澳門又實在太弱就贏硬佢，冠軍同包尾都無得爭之下，點樣攞到亞軍先係港隊目標。」
達成賽前目標
雖然港隊在實力不及泰國、印度，卻勝在鬥心足以及有個「鋼龍」葉冠英在陣，於首兩場就係靠這位「大港手」多次擋出泰國同印度的必入球，終於連贏兩場完成目標。即使最後以29:56大敗予伊朗，但仍無阻港隊奪得亞軍！
對於今次比賽所得所學，龐Sir滿意地表示：「呢班波得5個係港青成員，其餘都係未見過世面，但打出嚟嘅成績同表現絕對唔曳；證明咗喺手球界入面，掂嘅人係大有人在！而且，睇番呢班小朋友嘅表現，就令我對下年4月舉行嘅港澳埠際賽充滿信心，港隊能夠衞冕嘅機會都好高！」