迎小生命心情如踢波

9月28日乃「劉強」太座的預產期，將為人父的他，總在人前一臉不以為然，但其實內心既興奮又緊張。「就快做爸爸，就好似擺喺眼前嘅一個新挑戰咁！話唔緊張、唔擔心就假嘅，我同好多朋友一樣，都非常期待迎接新生命嘅嚟臨、做『爸爸』呢個新角色；情形就好似落場踢波一樣，我會盡全力做到最好。」聽畢這番說話，大家可會感受到「劉強」鐵漢柔情的一面？

防中右閘一樣冇問題

由前季尾開始，便因不同部位傷患而失去正選位置的「劉強」，上季更一度被外界以為經已退役。但經過之前暑假自動自覺加操，球隊開操後又依足列卡度的訓練要求，33歲的「劉強」自言，已經作好全面復出之準備。「基本上，我已經嘥咗一季，我唔想再浪費所剩無幾嘅足球員時間，我唔敢話自己100%回復晒水準，但8、9成一定有，只要教練相信我，我一定會用表現嚟證明畀佢睇。」擅長防守中場一職的「劉強」，首輪對大中後備上陣擔任防中，但上場鬥南華入替則出任右後衞，表現稱職，其中一次遭逢對方兩名外援夾擊，仍能殺出重圍，更予球迷留下深刻印象：「冇所謂啦！我求踢嘅啫，踢咩位唔係問題，最緊要幫到隊波，教練自有佢嘅安排。」

晨曦開季兩戰勝負各一，「劉強」相信列卡度會將其於天水圍飛馬的成功帶到晨曦：「上季食白果，今季全隊都好想捧盃，南華同傑志的確係好強嘅對手，但係唔使太擔心，我對Rambo（即列卡度）、隊友同自己好有信心。」至於今日一戰會與共事多年的陳耀麟、羅志焜，以及甄力健對陣，「劉強」表示沒有太大感覺：「咪當係之前練波踢分隊賽咁，贏佢囉！」