英國《太陽報》爆料，曼城同車路士嘅球員各自組織咗一隊《Call of Duty》網上聯盟，喺網絡上合作殺敵，兩隊正計劃打番場「友誼賽」，造就布歷治同泰利有機會正面交鋒！事實上兩隊球員都堪稱專業玩家，所有人都會戴晒耳機互相溝通，亦會商討戰鬥計劃，非常認真。

「神槍手」布歷治報綠帽恥辱

唔講都知，曼城嘅作戰計劃肯定會以泰利為重點，事關布歷治正正係「曼城聯盟」中最高分球員，甚至被冠以「神槍手」稱號，連泰維斯、胡禮菲臘斯同米卡李察士幾個高手都唔夠佢嚟。報道指布歷治將會以佢高超嘅射術，喺虛擬世界槍殺泰利洩憤！

至於「車路士聯盟」就以艾殊利高爾為首領，泰利、杜奧巴、馬隆達同艾辛都聽佢號令。消息人士透露：「佢哋玩呢隻遊戲玩得好認真，有時會有多達8個球員齊齊合作，而且不斷尖叫同呼喝，十足十真係打仗！」

肥安：聯賽依家真正開始

布歷治上季喺全球球迷面前公然拒絕同泰利握手，仇人見面當然希望攞彩兼贏波，曼城同車路士周日聯賽分別贏波造勢，車仔4:0大炒黑池後更喺積分榜一枝獨秀，不過領隊安察洛堤就表示：「車路士季初對手的確唔算太強，嚟緊對曼城一仗，就係聯賽真正嘅開始！」