哥帥叫球證保護美斯

開波13分鐘，美斯就入楔先開紀錄，慶祝加盟巴塞10周年，雖然魯爾加西亞為馬體會扳成1:1，不過到32分鐘，碧基接應美斯角球控定後抽入，為巴塞奠定2:1勝局。補時3分鐘美斯嘅噩夢出現，佢被剷到右腳變形，喊住被抬走，返到更衣室依然收唔到聲，好在冇骨折，今晨去咗醫院檢查一粒鐘，只係韌帶受傷，休息10日就可以康復，可能趕得切踢下周中嘅歐聯賽事。

聽日巴塞主場對希杭，美斯肯定缺陣，10月8號阿根廷作客日本踢熱身賽，佢就應該可以出席。根據合約，美斯唔出現阿根廷嘅出場費會被扣20萬美元（約155萬港元）！據講烏化奴斯已公開道歉，但巴塞教頭哥迪奧拿唔領情：「比賽錄像會交代一切，傳媒有義務報道發生咩事，美斯係西甲入面最唔鍾意插水嘅球員，球證應該保護所有球員，而唔係一味話要避免C朗受傷！」