本文重點
英超球員一向鍾意打Online Game，《Call of Duty》更加係球星至愛，唔少球隊仲用呢隻遊戲作為特訓武器，新特蘭同史篤城就曾分別組隊喺網絡上展開廝殺。
練完波即打機
《Call of Duty》係一隻團體合作嘅射擊遊戲，幾名玩家會扮演軍人組成一個小隊去完成任務，而史篤城陣中就有幾名球員係呢隻Game嘅愛好者，其中右翼利姆羅倫斯話：「我哋每晚都會一齊組隊玩，玩嗰陣會好似踢波咁互相溝通合作，所以會對踢比賽時有所幫助。」
至於另一支英超球隊新特蘭，就有一支更龐大嘅「黑貓軍團」，前鋒戴倫賓特話球隊入面有二十位球員，每日練完波都會玩呢個遊戲，佢仲話：「之前我哋同史篤城比賽過，結果輕易勝出，我知道車路士都有球員玩呢個遊戲，希望遲啲有機會可以同佢哋鬥一鬥。」