遇上「生命中最重要的她」

愛情令人轉變，這句話雖老土卻十分真實，已第五季効力晨曦的謝敏榮就是一個例證。自八年前投身甲組開始，謝敏榮便予人「玩就精神、練波頭暈」的不良印象，許多教練、班主一聽到其大名都會頭擰擰。直至年半前，與舊同學林小姐開始拍拖，過去一直「半夢半醒」的「螳螂」終於清醒，意識到是時候為將來打算：「拍得拖當然會為將來打算，我好想可以好似同期出道嘅陳思榮同張健峰咁成家立室，有自己嘅家庭；所以亦要學佢哋咁，用積極嘅態度去面對工作（即足球員），所以咪冇再好似以前咁喪玩囉！」「螳螂」直認女朋友就是其人生目標，為了可以達成三十一、二歲結婚的理想，未來四、五年將會搏命搵錢，除做好足球員這份工外，亦會於下月報讀教練班，切實為將來打算。

唔再喪玩報讀教練班

於晨曦首場聯賽3:0擊敗大中後，教練列卡度曾盛讚白榮澤和謝敏榮兩名左路球員的表現，並謂寄望兩人能成為球隊今後一大殺着。「螳螂」謂：「多謝Rambo（指列卡度）嘅信任，我同『阿澤』都夾得唔錯，雖然我大佢幾歲，但係落到場都有互相提場，佢上我落、佢落我上，希望表現令Rambo滿意啦！」「螳螂」亦對列卡度推崇備至，認為這位新帥十分專業，無論熱身賽或正式比賽，賽前都滿有部署，絕不會讓球員陣上踢天才波，一眾隊友都好希望為教練博取好成績。

入波即耍螳螂拳慶祝

今日晨曦作客南華，上季南華主場憑陳肇麒博得十二碼，最後以3:2擊敗晨曦，當日被球證指剷跌「陳7」的「螳螂」，對今日一戰充滿信心：「我第一年踢晨曦嗰陣，入波之後我就耍咗幾下螳螂拳嚟慶祝，啲隊友同球迷都睇得好開心，我決定今季如果有波入都會用呢種慶祝方式，希望對南華嘅時候就已經可以耍番夠本。」