本文重點
晨曦聯賽首戰贏波，其中正選上陣的左閘白榮澤演出大獲好評，深得會方、教練和傳媒點名稱讚的同時，卻有球迷以為他跟巢鵬飛、權赫台和凌琮等一樣，都是「黃軍」今季羅致的新兵，大讚晨曦沒有「入錯貨」！其實此子上季已屬晨曦一員，只是苦無上陣機會，才令大家以為他是「新嚟㗎？」
「上季前東方決定降落丙組，我同『灰熊』就加盟咗晨曦，可能係我表現畀唔到人信心，所以教練（指前教練甄力健）唔係好敢用我，喺季初踢過一場後，之後都冇乜機會落場喇！」「阿澤」回憶道。
謝恩師李健和陳曉明
不過，有云今時不同往日，自嘲上季為隊中「路人甲」的「阿澤」，今季前獲新帥列卡度公開表示，將得到球隊重點栽培。「梗開心啦！我估係因為熱身賽我表現出比上季淡定啩？我會繼續努力，因為我唔想令支持我嘅人失望。」場外總是一臉傻氣的「阿澤」笑謂。
場外一臉傻氣、場內則殺氣騰騰的白榮澤，坦言希望自己可以捉緊目前的機會，穩奪「黃軍」正選左閘之位同時，亦可助球隊奪得最少一個錦標：「雖然都踢咗幾年甲組，但其實一次決賽都未入過，好想感受一下捧盃嘅感覺。」
此外，「阿澤」還有一個心願，就是可以提升為大港腳：「若有一日成為大港腳，我將會邀請兩位恩師『李Sir』（指李健和）同『陳Sir』（指陳曉明）入場觀戰，藉此答謝兩人多年嚟嘅教導。」「阿澤」先後効力過香港09、華家堡和東方，三隊當時的教練正是李、陳兩人。