中國近年愈嚟愈發達，NBA當然唔會放過呢個金礦！日前宣布首度「外闖」，同上海電影（集團）有限公司合拍電影《Amazing》（神奇），並出動「魔獸」杜域侯活同安東尼，夥拍「Baby男友」黃曉明同南韓人氣女演員金亞中合作，到世界各地取景，誓要攻佔亞洲市場，呢勻NBA認真好睇過戲！

其實NBA一向都有同美國公司合拍電影（見附表），但同海外公司合作，呢次就係第一次。據報今次同NBA拍檔嘅係上海電影（集團）有限公司（SFG），而且仲簽咗多年合約。SFG曾拍攝640齣電影，同時係目前中國擁有最多院線嘅公司，睇嚟雙方長做長有。

據報雙方第一個合作計劃，將拍攝一齣名為《Amazing》（神奇）嘅電影，內容主要講述一班年輕人點樣透過努力實現夢想，當中參演演員陣容龐大，包括有金塊球星安東尼、魔術球星杜域侯活、《俏Betty》主角之一Eric Mabius、「Baby男友」黃曉明同南韓人氣女星金亞中，並由早前獲美國肯尼迪中心頒發個人榮譽獎嘅胡雪樺執導。

北京上海取景下年上畫

消息指呢齣戲喺今個月17號開始拍攝，杜域侯活同安東尼亦已抵達上海參與，並將喺11月前陸續於上海、北京同紐約取景，預計喺下年暑假正式上畫！

NBA近年積極進軍中國市場，例如喺08年同迪士尼等公司合作喺中國首辦表演賽，先後同7-11、adidas、可口可樂等大型企業成為夥伴，並喺上海世博開設8間NBA零售店，加上嚟緊10月仲會派火箭同籃網喺北京同廣州打季前熱身賽，預計喺《神奇》上畫後，將令NBA熱潮喺神州推上高峰！

NBA電影簡表

電影 上映年份 參演球星

He Got Game 1998 雷阿倫

Eddie 1996 洛文、霍斯、彼頓

Space Jam 1996 米高佐敦、巴克利

Forget Paris 1995 大衞羅賓遜、巴克利