希臘為備戰今個月28號喺土耳其舉行嘅男籃世界賽，近日舉辦一項四角賽，但呢隊東道主尋日對塞爾維亞卻打得極之火爆，最終喺完場前2分40秒，雙方因為一次嚴重侵犯發生口角繼而動武，之後更引發群毆，震驚在場5,000名球迷，有兩至三位球迷更乘亂衝入場加入毆鬥。其中効力NBA雷霆嘅塞爾維亞中鋒卡斯迪更隨手攞櫈扔向希臘中鋒保羅西斯頭部，令對方血流披面，比賽被迫腰斬。

卡斯迪隨時停兩場

之後雙方喺返入更衣室嘅通道上再次群毆，事後塞爾維亞中鋒卡斯迪被警方拘捕通宵問話。據駐希臘嘅塞爾維亞大使館發言人表示，卡斯迪尋日朝已獲保釋，並且被遣返塞爾維亞。但由於事態嚴重，國際籃聯（FIBA）已要求球場提供比賽錄影帶，唔排除罰卡斯迪停賽兩場，而被襲嘅保羅西斯，據報更準備控告卡斯迪傷人，睇嚟大把手尾跟！