作為66年世界盃冠軍功臣嘅卜比Sir，對於今屆世盃班英格蘭國腳演出其實唔多滿意：「英格蘭今次表現真係好差，班球員完全發揮唔到球會時嘅水準，呢隊波同66年真係差好遠，當時我哋有一位好領隊藍西爵士，所有球員都好尊重佢，球員之間亦好團結，但今屆世界盃我見唔到呢樣嘢。」雖然矛頭直指現任領隊卡比路，但卜比Sir始終覺得應該畀多次機會呢位意大利籍主帥，仲讚佢上場熱身賽肯重用新人，係個好嘅新開始。

養生之道凡事睇開啲

卜比查爾頓仲同小記大談佢嘅養生之道，就係凡事睇開啲，包括對足球都唔使太緊張：「有人話做英格蘭領隊係世界上最困難嘅工作，我唔認同，因為足球只係消閒活動！」問到邊個係曼聯領隊費格遜最佳接任人，卜比Sir認為只有一個大原則：「作為曼聯領隊，一定要帶領球隊進攻，因為我哋從來唔踢防守足球。」照咁睇，莫連奴都幾難如願做曼聯領隊！