最冧朗尼碧咸

奧脫福參觀團喺非比賽日都有得參加，雖然入場費要13鎊，但球迷依然源源不絕，球迷除咗可以參觀更衣室、喺曼聯後備席上拍照留念外，仲可以去曼聯博物館同買紀念品。Eva曾經贏得完美OL選美冠軍，究竟呢位索爆OL又鍾意咩球星呢？佢話：「我最鍾意碧咸同朗尼，最愛球隊當然係曼聯啦，所以今次嚟到奧脫福球場，心情特別興奮！」難怪Eva見到碧咸張相，即刻要同偶像合照，去到更衣室再見到朗尼件波衫時，更加唔捨得走。

13歲開始模特兒生涯嘅Eva，咪睇個樣「鬼鬼哋」，查實係香港土生土長，做緊模特兒同主持。咪以為Eva唔識波，原來佢睇波經驗好豐富，除咗睇過英超賽事外，06年世界盃決賽更係現場座上客，世界盃期間則為國內網站主持世界盃節目。

Eva仲話：「其實我好鍾意運動，每日都會做gym，又鍾意打籃球。今年6月時，睇完世盃再直踩睇NBA Final，總之一有波睇就好開心！」