本文重點
曼聯唔聲唔聲嚇人一驚！紅魔新兵查維亞靴南迪斯表現對辦，估唔到領隊費格遜未夠喉，尋日喺毫無先兆下，突然宣布以740萬鎊（約8,900萬港元）收購「流浪者」比比，呢位仁兄踢過無家者世界盃，細細個仲慘到要瞓街，身世極之淒涼！
細個瞓街踢無家者世盃
查實比比今夏由阿馬多拉轉會去葡超嘅甘馬雷斯，唔夠5個禮拜就畀曼聯撬走，認真離奇！據英國傳媒所講，現任葡萄牙主帥、前曼聯助教奎雷斯向費Sir極力推薦比比，爵爺亦都對舊部屬嘅眼光好有信心，轉會落實前只見過比比一次。
呢位20歲鋒將喺孤兒院長大，細個瞓過街兼曾經代表葡萄牙出戰無家者世界盃，身世都幾特殊，據葡萄牙球迷所講，6呎2吋高嘅比比能傳擅射，前鋒同攻擊中場都可以勝任，費Sir亦講到明唔會將佢借走。究竟呢位「流浪者」有幾多料？大家真係要拭目以待！