雖然NBA仲有兩個月先重開，但大部分自由身球員都已經落晒班，唯獨「T-Mac」麥基迪同「戰神」艾佛遜就仲量緊地。雖然呢兩大球星實力已經今非昔比，但話晒係一代球星，仍然有好強號召力，所以好多球迷仍然好希望下季NBA可以繼續喺場上見到佢哋比賽。
自從轉會市場重開後，盛傳麥基迪獲唔少球會垂青，最初係快艇，之後到公牛，不過美國《ESPN》尋晚突然爆料，指麥基迪已經同意加盟活塞簽約1年，但年薪竟然只得130萬美元（約1,009萬港元），屬於超低薪。早前38歲嘅奧尼爾加盟塞爾特人，簽約2年都有300萬美元，以麥基迪嘅名氣，以咁嘅人工打活塞，真係同做義工冇分別。
雖然活塞已經今非昔比，就算加埋麥基迪相信頂盡都係勉強入到季後賽，不過對於「T-Mac」嘅個人發展應該唔錯，畢竟同麥基迪一樣打開小前鋒嘅普林斯近年冇乜態，加上活塞近年最大問題就係欠缺入到波嘅射手，麥基迪嚟緊可謂大派用場，隨時搵番第二春亦唔奇！