最想探祖母行夜市

受到姚明邀請，林書豪尋日朝早喺父母、哥哥同細佬陪同下，闊別14年後首次重返台灣，一出閘就獲大批傳媒追訪，「小林」相當怕醜，僅以簡單中文表示感謝。之後開記者會，表示除咗想返鄉下探祖母講句「我愛你」之外，仲想行吓夜市，想食葱油餅等傳統小食，但就希望傳媒唔好跟住佢。

到夜晚，林書豪帶領姚明嘅「新聯心」喺台北小巨蛋挑戰美國明星隊，由於藝人周杰倫同羅志祥都有入場參加募捐比賽，共吸引6,662名觀眾入場。雖然「小林」上陣只有29分鐘，但就射入17分，當中包括3分波同入樽，可惜「新聯心」最後仍以103:137，大敗畀有公鹿球星班頓真寧斯壓陣嘅美國明星隊。至於2010年斯坦科維奇盃尋晚喺廣西柳州舉行，易建聯相隔346日後再代表中國比賽，雖然取得17分同10個籃板，可惜中國完場前被澳洲射入，最終以63:64輸波收場。