本年度MotoGP第9站移師加州爆發激戰，連續3站排頭位的羅倫素起步後雖被西班牙同胞柏度沙爬頭，但後者在第11圈炒車上岸，「百厭仔」漁人得利進佔首位，最終以3.517秒的極大優勢擊敗澳洲勁敵史東拿，首次揚威Laguna Seca跑道，並摘下今季第6個分站桂冠，其隊友、7星期前炒車致小腿骨折的9屆世界冠軍羅斯，雖仍要用拐杖，卻無阻他衝得季席，再踏三甲頒獎台。

扮太空人月球漫步「插旗」

該對Yamaha「孖寶」賽後表現High爆鬥搞Gag，「早有預謀」的羅倫素「入鄉隨俗」，模仿「美國太空人月球漫步」再「插旗」；「Gag霸」羅斯上頒獎台後更將兩支拐杖拋給Fans做禮物，同樣搶盡風頭，不過，未知後台工作人員是否以為他贏了冠軍，頒獎禮上竟播了意大利國歌，氹得羅斯笑逐顏開，反觀羅倫素就一臉錯愕，面色一沉，幸好大會及時醒覺，重新播放西班牙國歌，「百厭仔」才即時「笑番晒」！

羅斯衝得季席拐杖贈車迷

對於自己能在復出第2場就可飆入3甲，賽後「攰到謝晒」的羅斯說：「我真係好開心！雖然我個樣唔似，因為我覺得周身都痛！我要多謝所有幫我重返賽道嘅人。」羅倫素目前憑6冠3亞佳績高踞車手榜首位，拋離次席柏度沙72分，羅斯則落後120分排第5。至於剛奪環法錦標的干達杜昨已凱旋返國，即獲西班牙首相薩帕特羅接見。