勇士尋日安排一間細房交代林書豪加盟消息，結果吸引大批電視台同印刷媒體採訪，林書豪坦言喺哈佛從未見過：「實在太不可思議，我從未見過咁嘅情景。」由於勇士所在城市三藩市擁有大批華人，所以林書豪目前已經成為當地名人，不過「小林」表現得好謙虛：「比起華裔，我更關心自己係一名籃球員。我已經做好準備，好感激嚟自華人嘅支持，今日就好似夢想成真一樣，因為我一直希望打NBA。睇住史比威爾嘅海報、着住祖史密夫嘅波衫長大。」

美傳媒爭相挖底細

其實林書豪之前打Ivy League時已經好勁，係lvy首個錄得1,450分、450個籃板、400次助攻同200次偷波嘅球員：「我明白NBA唔係太多亞洲同Ivy球員，但或者我會打破呢個局面。」

隨住「小林」一夜成名，傳媒開始狂挖呢位早前被《ESPN》譽為全美最全能12名球員之一嘅身世，好似話佢祖籍係浙江嘉興平湖，每年都會返鄉下捐錢同教細路打波；係虔誠基督徒、話唔打波就希望做牧師；老竇林杰明係籃球癡，自細就栽培佢哋三兄弟打籃球；覺得自己最似太陽後備達基斯，仲揚言自己打波風格好適合打NBA，因為自己善於檔拆（Pick and roll），大家真係要拭目以待呀！