本文重點
由勒邦占士、韋迪同保殊組成嘅熱火Big 3組合，未開波經已被視為新一季NBA總冠軍奪標大熱，其至連過氣老將A夏達威都被吸引到自薦復出！外號「Penny」嘅佢受訪時表示，好希望再次回歸熱火，甚至不惜放低昔日巨星尊嚴，願意充當大後備！
麥基迪快艇搵撈
Penny以往効力魔術年代，一度被視為魔術手莊遜接班人，可惜由於膝傷關係令佢愈打愈沉，直至07年被熱火放走之後就一路無班落到依家。39歲嘅Penny眼見熱火組成Big 3組合，竟然心郁郁向外表示想回巢：「即使我嘅角色唔再係正選，我都希望成為呢支偉大球隊嘅其中一員。」
至於另一過氣球星麥基迪，上季未能喺紐約人打番以往表現就黯然離隊，現屬自由身嘅佢仲衰到要去快艇搵撈，希望搵到一紙新約。
同時，尼特羅賓遜亦同意續留塞爾特人，雙方仲將會簽訂一份兩年800萬美元嘅合約。