熱火尋日喺佢哋美國航空體育館主場舉行歡迎會，13,000張免費門券僅只一小時就派清，直到開場時候，場外仲有過萬人打氣支持。占士、韋迪同保殊喺歡迎會分別穿上白色嘅6號、3號同1號熱火波衫登場，舞台上強大燈光效果兼夾煙霧迷漫，同紅歌星開騷冇乜分別。喺三王步入舞台中央之際，台上仲打出「Yes We Did」（我哋成功啦！），即時將球迷熱情推向高峰，之後三王走向台邊與球迷擊掌，絕對係冧爆Fans。

各自減薪1.2億

企正中間做「大佬」嘅「閃電俠」韋迪寸爆咁話：「真係唔好意思，無論邊個要Mark住我哋都好辛苦。」由速龍加盟嘅保殊話要同兩個好拍檔開創大業，至於占士則話：「感覺真係冇得彈，我哋要話畀全世界聽，熱火已經返嚟嘞！」

同日三王仲正式同熱火簽約，據知三人都分別各自減薪1,500萬美元（約1.2億港元），當中占士同保殊新約都係為期6年總額約1.1億美元（約8.5億港元），韋迪則係6年總額約1.07億美元（約8.3億港元）。

占士3.8億買新屋

歡迎會上氣氛熱爆，其實場外一樣氣氛高漲。就喺尋日推出市場嘅占士熱火新波衫，基本上一拆箱毋須上架，就已經售出，球場之外更大排長龍，只係為登記成為季票後補嘅輪候人。除此之外，自傳出占士會加盟熱火，有望搬往南佛羅里達後，當地豪宅市場即時更見活躍，有經紀更打住「占士未來大宅」做旗號促銷，唔少人都想放盤畀占士。日前仲有消息指，占士已經開價4,950萬美元（約3.8億港元），欲買入當地汽車大亨保達堅嘅豪宅。占士嘅威力，真係勁到你唔信。