NBA史上最強「三巨頭」正式誕生！今夏NBA最矚目自由身球星勒邦占士，尋日公開轉會去向引發全球哄動，最終如外間所料轉會熱火。據「大帝」透露，佢同韋迪、保殊3位「03」一代為爭冠軍，今次都不惜減薪，即管睇吓呢隊拍得住美國夢幻隊嘅陣容可唔可以如願實現夢想！

等到頸都長埋，勒邦占士尋日終於喺香港時間朝早上《ESPN》嘅特備節目公布去向。據「大帝」講，原來佢尋日一起身仲未決定加盟邊隊，直至同母親傾完先有決定：「媽媽同我講，要做出令自己開心嘅決定！」

韋迪保殊詐傻扮唔知

最終勒邦占士喺全世界見證下宣布加盟熱火，同03年一齊以新秀身份加入NBA嘅韋迪同保殊組成NBA史上最強「三巨頭」。對於呢次決定，占士不諱言係為咗爭冠軍，同時表明唔係為錢：「我哋都會減薪，因為我哋想一齊打波。」

對於占士嘅決定，韋迪同保殊都「扮唔知」交足戲，分別以「crazy」同「madness」兩個同樣解做瘋狂嘅字嚟形容3人可以一齊効力熱火。

大帝搶查馬斯6號衫

事實上，呢3人嘅實力大家有目共睹，如果將佢哋最巔峰數據相加，平均每場可以攞到86分、24.4個籃板同19次助攻。韋迪、勒邦占士同保殊今次組成「三巨頭」，外間自不然用佢哋同雷阿倫、皮雅斯同加納特比較，但據《ESPN》分析，占士所領導嘅「三巨頭」完全超班，至少未攞總冠軍前，加埋已經攞咗2屆常規賽MVP同1屆NBA總冠軍。兼且呢3人依家年紀最大嘅韋迪都係28歲，外間估計呢個「三巨頭」組合至少可以統治NBA8年，難怪占士尋日已經開始密謀準備搶熱火小將查馬斯件6號波衫，提早奠定王位！