《ESPN》尋日晏晝仲講速龍球星保殊可能會轉會騎士，點知去到香港時間夜晚9:30，突然傳出韋迪會留效熱火，而保殊亦轉會到呢支東岸勁旅。到今晨00:30，兩名球員嘅經理人已經證實兩人下季將會喺熱火合作，暫時只係未知保殊會先同速龍續約，然後被作為籌碼同熱火交換球員，簽署一紙6年總值1.25億美金（約9.7億港元）合同，定係選擇恢復自由身，同熱火簽5年價值9,600萬美金合約。

保殊轉會唔為錢

韋迪同保殊之後齊齊現身《ESPN》嘅「SportsCenter」節目接受直播訪問，雙方均形容今次合作唔係一個容易做嘅決定。其中保殊更指出今次選擇加盟熱火並唔係為錢，目的係幫熱火攞總冠軍。