本文重點
NBA自由身市場尋日終於爆出今夏首單最轟動轉會，就係太陽球星史杜迪米亞正式加盟紐約人，據報5年合約總值接近1億美元（約7.8億港元），但有消息指呢單交易只係前奏，盛傳紐約人仲斟緊勒邦占士同韋迪，有機會組成NBA史上最強「Big3」！
7.8億簽約5年
為歡迎史杜迪米亞加盟，紐約人尋日喺麥迪遜廣場公園入口擺滿「大米」着上紐約人1號波衫嘅標語，呢位5屆明星賽球員亦好識做，特別戴上印有紐約人logo嘅帽喺公園門前拍照。據報該名27歲球星將獲1份5年、總值9,970萬美元嘅合同。
史杜迪米亞亦爆料最近曾多次同占士接觸，並揚言今次擔任先鋒角色將成功打動占士加盟紐約人：「我覺得占士會為我轉會感到高興。我好有信心紐約人因為簽入我，嚟緊可以吸引多幾位球星加盟，當然最好就係占士啦！」