韋迪喺周五同公牛展開第2次會面，全程2個半鐘頭嘅會議出席者除咗有公牛高層、佢及經理人之外，據報仲包括埋保殊添！再加上韋迪同保殊曾傳出周四晚喺飯局中會面商量轉會問題，似乎兩人都有晒默契，難怪韋迪喺會後都話：「事情進展愈嚟愈有趣！」

皮雅斯有意留隊

由於韋迪、保殊同占士都相當friend底，所以外界已經諗緊占士會唔會一齊加盟，但韋迪就耍晒太極：「我哋當然好老友啦，但轉會咁大件事要由佢自己做決定。」至於火箭中鋒姚明亦喺twitter留言，為吸引保殊加盟出最後一分力！

另外，太陽大前鋒史杜迪米亞據報可能轉投紐約人，雙方仲會簽署5年1億美元（約7億7,900萬港元）嘅合約。至於塞爾特人三巨頭之一皮雅斯就有意留隊，但大家仍然為4年6,100萬美元（約4億7,500萬港元）合約商量細節問題！