01/07/2010

播放本新聞相關短片

騰出薪酬空間簽占士韋迪

NBA自由身轉會市場喺美國時間7月1號就會正式展開,不過唔係自由身嘅中國球星易建聯尋日就率先搶閘加盟巫師打響頭炮,搞到皮雅斯同魯域斯基都心郁決定加入自由身行列,令今年夏天被喻為NBA史上出現最多巨星嘅自由身市場再添2名猛將!

籃網尋日係用易建聯再加300萬美金(約2,340萬港元)交換巫師小前鋒昆頓羅斯,目的就係騰出薪金簽大牌球星,據講籃網透過今次交易成功騰出300萬美金薪酬空間,依家粗略估計已經有3,000萬美金備用,只要再清多300萬美金,就有本錢一次過簽入勒邦占士同韋迪兩大球星。

3年內第2次轉會

雖然今次已經係阿聯加入NBA3年嚟第2次轉會,但好多傳媒都睇好呢位中國球星喺巫師可以有更好發展,一來巫師上季已經送走占美臣同卡朗畢拿等主力,二來巫師早前成功簽入同樣擅於助攻嘅「狀元」約翰禾爾同公牛控衞軒域治。對於簽入易建聯,巫師主席格倫菲德更揚言阿聯將成為唐人街嘅長城,而阿聯亦對轉會非常樂觀:「被交易唔係壞事,我鍾意呢種挑戰。」

姚明續留火箭

另外,雖然已經32歲,但塞爾特人老臣子皮雅斯尋日令人意外地提早恢復自由身;正喺家鄉德國度假嘅魯域斯基,據報亦已通知小牛決定跳出剩餘嘅1年合約。但有消息指小牛仍希望同佢續約,主席當尼尼爾遜更已訂機票喺今日飛去德國游說魯域斯基留隊。至於火箭球星姚明則決定履行最後1年合約,表示最少留效火箭多一季。