拉舒華萊士退休

由高中時代開始已經係大紅人嘅約翰禾爾，尋日喺選秀會中如願成為肯塔基史上首個NBA狀元，外間均認為佢同下季復出嘅阿連拿斯可以重新振興巫師，不過禾爾話唔剩止要帶領球隊殺入季後賽，仲要搶埋阿連拿斯個「大佬位」：「我不嬲都係領袖，永遠最早去球場練波但最遲走。我對隊友一視同仁，就算你經驗老到如果打得唔好我都會照鬧。」連埋禾爾，肯塔基今年有5人喺第1圈被揀中，創出NBA新歷史。

事實上，巫師方面似乎亦有心扶約翰禾爾上位，據報就快獲得公牛老牌後衞軒域治，同時仲已邀請中國球星孫悅打即將舉行嘅夏季聯賽，睇吓啱唔啱用。有新人加入，當然有舊人離開，NBA官網尋日就宣布，今季幫唔到塞爾特人攞冠軍嘅拉舒華萊士已經決定退休，結束15年職業生涯。

今季NBA選秀頭5位

名次（位置） 加盟球隊

1.約翰禾爾/控球後衞 巫師

2.伊雲端納/得分後衞 76人

3.法禾斯/大前鋒 籃網

4.韋斯利莊遜/小前鋒 木狼

5.卡辛斯/中　鋒 帝王