美斯生日飲狗尿

根據阿根廷TELEFE電視台消息，由阿根廷模特兒界超級經理人羅伯特佐丹奴組織、名為「電力組合」嘅美女演唱組合，本來諗住喺分組賽後就飛去南非慰問大軍，幫佢哋打氣。可惜最終球王都係拒絕呢個提議，事關佢認為球員喺呢個階段係唔應該受到騷擾，突然咁清醒，的確出乎球迷意料。

另一邊廂，美斯尋日就度過佢23歲生日，成班國腳隊友之前一晚就喺馬納當拿個大套房幫佢搞咗生日派對，馬納當拿仲同一個資深攝影師，齊齊送咗件印上「FELICES23」（意即23歲生日快樂）嘅阿根廷國家隊波衫，馬納當拿仲喺件波衫親筆題字祝福，寫住「向里奧獻上最親切的問候和最摯誠的崇敬。你的教練迪亞高馬納當拿！」氹到美斯鬼咁開心。

不過，佢隊友泰維斯同希古恩就大整蠱，將隻南非品種布波狗放入禮物盒送畀美斯，仲叫美斯仔估吓係乜，好衰唔衰美斯淨係見到有水喺個盒流出，以為係香檳，最後先發現係隻狗仔瀨尿，美斯仲試咗少少味先知！泰維斯同希古恩仲幫隻狗改名做VuVuzela添，飲狗尿過生日，又有「VuVuzela」收，美斯肯定難忘。