其實湖人尋日贏得非常驚險，喺第3節一度落後塞爾特人13分，但憑最後一節勁入30分，最終以4分之差反勝「綠軍」，創出NBA總決賽史上最差命中率（32.5%）但仍然贏波嘅球隊，更難得係贏得球會史上第16座NBA總冠軍，僅落後塞爾特人1次。

高比冧莊MVP

湖人眾將尋日都有唔錯發揮，其中加素有19分同18個籃板嘅「雙雙」成績，首次贏得NBA總冠軍嘅阿堤斯亦有20分進帳。雖然高比拜仁手風欠順，24次起手只得6中，但仍然射入全場最高嘅23分，兼成功冧莊MVP。雖然已經係第5次贏NBA總冠軍，但高比賽後仍非常興奮，跳上記分枱上張開雙手接受球迷嘅喝采，並獲塞爾特人名宿標羅素頒獎：「今次係我贏總冠軍有史以嚟最開心嘅一次，因為對手係塞爾特人。」

高比之所以咁講，全因佢為湖人打破宿命，超越名宿謝利韋斯同魔術莊遜，帶領湖人首次喺總決賽第7戰擊敗塞爾特人，同時帶領湖人贏得兩隊歷來喺總決賽12次交手第3次勝利，兼成為94年後，NBA首支喺總決賽落後2:3下反勝捧盃嘅球隊。

首隊落後2:3反勝

今次係湖人自00-02年後，首次成功衞冕NBA總冠軍，賽後謙虛自稱今場表現只值「E」嘅高比拜仁，話已經準備好下年再接再厲，為湖人創造第2次「三連霸」。湖人將會喺當地時間下星期一進行勝利巡遊，相信到時高比仔將有更激動人心嘅演講。

湖人冠軍之路

總決賽

贏塞爾特人4:3

西岸決賽

贏太陽4:2

西岸4強

贏爵士4:0

西岸8強

贏雷霆4:2