本文重點
湖人尋日勇奪NBA總冠軍，今晚輪到香港甲一籃球爆發總決賽第一回合！與湖人同樣屬衞冕之師兼身穿黃衫的永倫，將迎戰常規賽霸主南華。今季幾度敗在南華手上的永倫，主力黃鎮煒豪言要在今晚大報復！
湖人奪冠激勵黃鎮煒
今季已接連在銀牌賽、甲一常規賽不敵南華的永倫，於今晚再鬥南華難免信心有損。不過，永倫中鋒黃鎮煒昨日卻受到NBA決賽影響而士氣大振，並在facebook上「吶喊」：「睇住湖人拎總冠軍，令到我個心有一個好強感覺！要有團火呀！永倫亦要拎多一次、唔只一次，仲要好多次嘅總冠軍！加油呀！永倫嘅兄弟們！」
不過，南華隊長譚偉洋則表示己隊才有冠軍相：「今年已經贏過佢哋幾次，心理上一定會好啲！雖然自己左膝仍然有啲傷，但紮住嚟打都唔係第一次嘅事啦，呢啲都係小問題。」賽事今晚8時半假修頓室內場上演，採取5場3勝制；頭場季軍戰7時鳴笛，由飛鷹出戰福建。