柏堅斯尋日喺第1節搶進攻籃板嗰陣，食咗湖人拜林同高比拜仁嘅「三文治」，結果落地時扭傷右膝。雖然柏堅斯賽後表示有信心聽日復出，但軍醫檢查後發現佢傷咗兩條韌帶，換句話講Game7九成唔使預佢。

拜林自己要求換走

賽後塞爾特人一班球員都表示對柏堅斯復出唔樂觀，但就拒絕用佢作為攞唔到冠軍嘅藉口，皮雅斯話：「柏堅斯為我哋喺籃板同防守作出好多貢獻，雖然佢下場唔出得，但絕對唔係藉口，因為我哋係一支心理質素好強嘅球隊。我哋今季成季都受傷患困擾但都可以捱過。就算是但一個唔打得，我哋都知點樣贏波。」

另一方面，本身有膝傷嘅湖人中鋒拜林尋日打咗16分鐘亦因為頂唔順要提早返入更衣室，賽後積遜表示：「拜林同我講：『你換我走啦，我真係跑唔到。』」睇嚟聽日上陣機會都唔大。