本文重點
每個人都有唔同嘅動力來源，塞爾特人射手雷阿倫嘅動力，肯定係嚟自屋企人！綠軍尋日喺Game5擊敗湖人，原來前一晚雷阿倫個囝囝曾經入過醫院，呢位老將到開波前先到場同球隊會合，雖然奔波勞碌咗成晚，但有囝囝喺場邊打氣，Daddy當然唔會令愛兒失望啦！
要求揀綠色藥食
雷阿倫囝囝獲加喺08年被驗出患上糖尿病，一路要靠服食藥物控制病情，雷阿倫話：「護士氹獲加食藥，畀咗紅、藍、紫3隻色佢揀，我同佢講唔可以揀紫色，因為『紫金兵團』係綠軍嘅死對頭，獲加於是要求食綠色嘅藥，真係好得意！」
雖然身體唔好，但係獲加不嬲都好想現場幫爸爸打氣，尋日場波佢就喺媽咪陪同下坐喺場邊，給予雷阿倫極大動力。塞爾特人能否贏得總冠軍，Game6場波係關鍵，雷阿倫表示：「獲加想全副塞爾特人裝備去洛杉磯幫我打氣，我同老婆商量吓，睇吓獲加適唔適合搭飛機再作決定。」