本文重點
塞爾特人仲爭一步！尋日上演嘅NBA總決賽第5戰，皮雅斯同高比拜仁兩位近兩屆總決賽MVP正面交鋒，雖然高比喺得分上勝對手，但皮雅斯最後獲隊友力撐，成功帶領塞爾特人主場以92:86擊敗湖人，總場數領先3:2，只要聽日再贏一場，就可以捧走球會史上第18個總冠軍！
08年總決賽MVP皮雅斯，尋日射入今個系列賽最高嘅27分，至於上屆總決賽MVP高比拜仁就仲犀利，狂入38分，當中單喺第3節嘅頭8分鐘更加着晒火，狂轟19分，可惜衰在唔夠支援，全隊只得番加素有雙位數字得分（12分），相反皮雅斯就有加納特（18分、10個籃板）、朗度（18分、8次助攻）同雷阿倫（12分）作後盾，最終成功贏波。
第6戰輸波例無緣冠軍
塞爾特人從未試過喺領先3:2下失落冠軍，賽後皮雅斯認為尋日呢場係球隊今季最重要嘅勝仗：「我哋依家喺一個非常有利嘅位置，我哋嚟緊有兩場比賽喺洛杉磯打，但只要贏一場就夠！」
對於尋日一戰被視為佢同高比拜仁嘅對決，皮雅斯賽後極力否認：「呢場唔係我哋嘅個人對決，我冇講過要同佢鬥得分。」至於高比拜仁則呼籲隊友振作：「輸咗一場波，唔係咩大問題啫？如果我咁就責怪隊友，我覺得我哋唔配攞冠軍。雖然我哋依家落後2:3，但嚟緊我哋將會連續兩場喺主場比賽，只要贏晒我哋就係冠軍，就係咁簡單。」
不過塞爾特人當然唔會咁易畀湖人贏，事關根據歷史，原來領先3:2嘅球隊，如果喺第6場輸波，就肯定攞唔到總冠軍，所以聽日塞爾特人作客湖人受讓6.5分，下盤絕對值得支持！