「綠軍」未贏先驕！雖然日前擊敗湖人總場數追成1:1，不過塞爾特人球員當正自己贏硬，雷阿倫先寸佐敦紀錄不外如是，格連戴維斯更叫總統奧巴馬接見佢哋，認真「囂士」！

雷阿倫日前喺第2戰半場射入7個3分波，比米高佐敦喺92年射入6個仲犀利，本來雷阿倫最初接受訪問時話唔知自己破咗紀錄，不過之後佢竟然話佐敦同佢冇得比：「我要話畀佐敦聽，佢射波比我雞好多，佢唔使走位，淨係企喺外線等接波，唔似我要擋拆搵空位。」

格連戴維斯叫奧巴馬接見

不過講到囂都唔及格連戴維斯，事關「Big Baby」喺第2戰前喺女友慫恿下當住鏡頭講：「奧巴馬，我哋嚟啦！」須知NBA只有總冠軍先會得到美國總統奧巴馬喺白宮接見，戴維斯咁講擺到明攞硬。但點都好，呢場總決賽的確人氣好勁，好似日前嘅第2戰，ABC電視台又錄得10.9收視率，比上屆魔術對湖人得9.9，升咗10%，係自04年後第2戰最高收視。