08/06/2010

播放本新聞相關短片

雷阿倫8個3分波勁過佐敦

塞爾特人「老嫩雙傑」顯身價!雷阿倫同朗度尋日喺NBA總決賽次回合打出驚世之作,老將雷阿倫3分雨破米高佐敦紀錄,新星朗度就食出「大三元」成鄧肯後第一人,最終作客以103:94挫湖人,打破對手今屆季後賽主場不敗身,總場數追平1:1,對於嚟緊連續3場主場作戰嘅「綠軍」嚟講,可以話為爭標注下強心針。

首回合因Mark唔住高比,搞到個犯纏身上陣僅27分鐘嘅雷阿倫,尋日以彼此道還施彼身,藉單擋戰術走出外圍射3分波,單喺半場就入7個,比米高佐敦喺92年半場入6個更犀利,全場入32分嘅雷阿倫最終入8個3分波,超越柏賓、堅尼史密夫同佢自己2年前所創嘅舊紀錄。

雷阿倫破紀錄懵然不知

對於自己成為NBA總決賽史上1場射入3分波最多球員,雷阿倫賽後話:「我真係唔知自己破咗咩紀錄,直至賽後有人話我聽,但我真係好開心做到。」

朗度食大三元媲美鄧肯

其實湖人尋日打得唔曳,除咗高比拜仁有21分,加素同拜林更完全控制內線,合力取得46分、14個籃板同13次封波,可惜「綠軍」尋日除咗雷阿倫之外,仲有朗度取得19分、12個籃板同10次助攻。

NBA總決賽對上一次有人食出「大三元」,已經要數到03年馬刺嘅鄧肯,賽後朗度話:「食出『大三元』最好就係帶領球隊贏波,如果做出『大三元』但球隊輸波,根本冇意義。」隨住總場數追平1:1,塞爾特人嚟緊將連續3場返番主場對湖人,聽日小讓3.5分,絕對有力乘勝追擊反勝,一於撐上盤。

大衞李風