本文重點
加納特只係一個「跳投男」？NBA總決賽第2回合聽朝殺到埋身，賽前湖人球星加素率先辣火頭，寸加納特今非昔比依家淨係識跳投，不過塞爾特人一眾球星卻力撐「KG」，認為佢上場只係太攰！究竟邊個先啱？睇完聽日場波咪知答案囉！
綠軍撐加納特冇跌Watt
湖人大前鋒加素首戰對塞爾特人獨取23分同14個籃板，相反，加納特就只得16分同4個籃板。賽後加素批評依家嘅加納特，已經唔係佢以前視為偶像嘅「KG」：「依家嘅加納特已經冇晒爆發力，十足十一個『跳投男』。以前佢第一步好快，好有侵略性，但隨住年紀增長，佢已經大不如前。」
不過，塞爾特人教練李華士就反擊加納特未老，同時強調「KG」冇受傷患困擾，上場之所以打得咁差，全因精神上太攰；皮雅斯亦話呢啲情況好常見，叫加納特做番自己就得，至於加納特就話：「呢場唔係我同加素嘅單對單獨鬥，而係湖人同塞爾特人。為咗令球隊好，聽朝我會打得更進取。」
其實今屆NBA總決賽好受球迷歡迎，好似首戰咁，美國ABC電視台就錄得自04年後最高嘅10.4收視率，比起上屆魔術對湖人只得8.9，足足升咗17%，所以大家聽朝唔好錯過呀！