唔知高比拜仁聽到呢單消息之後，會唔會後悔簽《NBA2K10》做代言人呢？皆因美國有傳媒最近用呢隻大熱電玩遊戲模擬NBA總決賽，結果湖人最後竟以1:4大敗「綠軍」塞爾特人手下，認真諷刺！

《NBA2K》系列一向係Game界大熱，對上一集搵嚟高比拜仁做封面代言人。由於遊戲特別搵「小飛俠」親身示範各動作，所以高比喺入面特別維妙維肖。於是有美國傳媒就用呢隻Game模擬今屆NBA總決賽，結果頭幾圈都幾準，先後預測到湖人輕鬆淘汰雷霆同太陽，不過去到總決賽，雖然高比拜仁表現神勇，可惜最後被塞爾特人技術性擊倒大敗1:4。

破天荒搵佐敦拍封面

其實《NBA2K》系列，最近每隔一年就換封面代言人。據《espn》記者透露，本來最新一集《NBA2K11》打算搵勒邦占士、戴歷羅斯或泰拉基伊雲斯是但一個，但經商量之後，最後決定搵米高佐敦復出，成為呢隻人氣Game有史以嚟首次出現退役球星、同球隊老闆擔任封面人物。想知係咪真？大家就要密切留意10月5號嘅出街日啦！