病貓發火，非同小可！之前被人狂插喺籃底完全冇料到嘅史杜迪米亞，尋日返番主場終於發火，狂轟42分成功反擊指控，仲幫鳳凰城太陽以118:109做低湖人，總場數追成1:2，出線Final未絕望！

鳳凰城中鋒史杜迪米亞上兩場作客湖人表現曳到爆，無論防守、籃板抑或鬥心，都被人插到體無完膚，不過佢冇自暴自棄，反而選擇用一個禮拜時間靜靜咁聽球迷嘅訴求，結果尋日成功大爆發，射入平自己季後賽新高嘅42分，搶到11個籃板，成績媲美奧拉祖雲等名宿，成為NBA史上、第5個喺季後賽一場攞40+得分同10+籃板嘅球員。

湖人拜林打柴唔怕反

史杜迪米亞雖然喺比賽中畀自己嘅眼鏡割傷額頭，不過佢賽後依然好興奮激動：「你絕對唔可以懷疑我嘅決心、專注同貢獻。呢啲都係令我不斷改善自己嘅原因。我一直希望自己可以長期保持明星級水準！」

湖人雖然有高比拜仁取得36分、9個籃板同11次助攻嘅「準三雙」，可惜唔夠人支援，最終亦要輸波終止季後賽8連勝紀錄。最慘嘅係湖人中鋒拜林右膝傷勢加劇，教練積遜暗示佢第4戰可能缺陣，聽日作客太陽受讓2.5分，都係捧上盤為妙！