以前已經叫過勒邦占士過檔公牛嘅美國總統奧巴馬，尋日又出口術，喺電視公開勸「大帝」去芝加哥，原因係公牛有一班好球員，可以輔助占士複製米高佐敦王朝喎！
美國總統奧巴馬日前喺白宮接受電視台訪問，佢再次勸勒邦占士去自己愛隊公牛：「戴歷羅斯同諾亞已經組成唔錯嘅核心陣容，如果加埋占士，將會係一個好強勁嘅配搭。」之後奧巴馬仲將占士同公牛名宿米高佐敦比較，話佐敦頭7年打NBA都攞唔到總冠軍，直至開始信任教練積遜，同搵到柏賓等「綠葉」，佐敦先可以喺90年代取得6次總冠軍。
占士會唔會離開騎士仲未知，不過教練米克布朗尋日傳出已被騎士炒魷，另有消息指佢已經畀5間球會睇中，即使失業都唔憂冇出路。