葉莉喺美國休斯敦一間醫院順產後，姚明立即透過社交網站發放喜訊，獲得大量球迷及網民祝賀，佢話：「我真係好興奮，今次係我哋夫婦生命中一個特別時刻，非常感謝大家嘅祝福。」姚明同葉莉喺2007年8月結婚，並於今年1月傳出葉莉懷有身孕，消息話姚明仲未為囡囡起名。

遺傳學計算長大高2米

「姚千金」降臨之後，中國球迷最關注嘅係佢嘅國籍問題，根據美國法例，由於「姚千金」喺美國出生，因此佢已經獲得美國國籍，但中國法律唔承認雙重國籍，所以姚明若果想為女兒攞中國國籍，就要放棄美國公民身份。或者呢個問題極度敏感，姚明一直都唔敢正面回答，佢話只想女兒可以喺一個健康嘅環境長大。

事實上，「姚千金」已成為球迷間熱烈討論話題，例如佢會唔會好似爸爸同媽媽一樣「高人一等」。有醫學專家指，姚明身高2.29米，葉莉身高1.9米，利用遺傳學公式計算，「姚千金」長大後，身高應會介乎1.945米至2.085米之間，堪稱超級高妹。因此，一般估計「姚千金」將來好可能成為籃球員。

姚明榮升爸爸，一眾好友都替佢高興，好似易建聯就透過社交網站祝佢哋一家快樂，其歌星好友孫耀威亦留言恭喜「小巨人」呢！