所向披靡嘅衞冕冠軍湖人都有剋星？凰鳳城太陽是也！06同07年先後兩次喺季後賽首圈畀太陽淘汰，對湖人球星高比拜仁嚟講依然歷歷在目。為咗報仇雪恨，高比仔同佢一班好拍檔已經準備好致勝三招，喺聽朝展開嘅西岸決賽，誓要將鳳凰城踢出局，向衞冕總冠軍進發。

絕招1

壓制拿殊快攻

眾所周知太陽嘅進攻命脈盡在控球後衞拿殊手中，由呢位加拿大球星策動嘅快攻，為鳳凰城取得極多分數，季後賽平均得分達到105.8分，係目前爭逐總冠軍4支球隊之冠，足足較湖人多出4.8分，克制拿殊自然係湖人制勝關鍵。

為防守拿殊，湖人教練「禪師」積遜已經制訂好一個獨特戰術，就係每當佢哋入完波之後，就即刻搵人緊貼拿殊，唔畀佢策動快攻。積遜賽前仲大打心理戰話：「真係好難Mark得到拿殊，因為冇人可以好似佢咁帶波。」積遜暗指拿殊嘅高速運球其實係有走步嫌疑，變相同球證施壓。

絕招2

強大內線擋3分雨

太陽係常規賽3分球命中率最高球隊，命中率高達41.2%，季後賽佢哋嘅準繩度更加係有增無減，除咗拿殊去到41.7%之外，外圍其餘兩大炮台積基斯同積遜李察遜，仲去到44%有多，「3分雨」攻勢就係佢哋殺入西岸決賽嘅強力武器。

不過，你有利矛，偏偏湖人都有強盾。「紫金兵團」正是常規賽防守3分最出色球隊，能夠將對手3分球命中率壓到32.8%，湖人老將費沙就點出成功關鍵：「我哋內線夠強，可以令我哋放心出去防守。佢哋可以搶到防守籃板，亦會令對方射手有壓力。」守得住鳳凰城嘅3分球，勝望自然會大幅提升。

絕招3

掌握節奏唔鬥快

除咗唔畀鳳凰城打快攻，積遜教練最後一着就係好好控制湖人嘅進攻節奏，唔好落入太陽嘅陷阱，同佢哋鬥快。積遜認為面對太陽時，應該將進攻模式系統化，用指定幾套戰術，將進攻節奏保持。

高比仔都深明控制進攻節奏嘅重要性：「你必須控制進攻速度，減少犯錯。佢哋自從季後賽開始，愈打愈有信心，表現愈嚟愈穩定。要知道同太陽鬥快係最危險嘅，佢哋嘅速度最易令人犯錯。」湖人喺常規賽面對太陽雖然取得3勝1負，但如果一不留神，能唔能夠再晉一級都好難講。